Ephesians 2
“Naní̵naní̵wá nánɨ imónagwɨ aí Gorɨxo sɨŋí̵ neaimɨxɨŋí̵rɨnɨ.” urɨŋí̵ nánɨrɨnɨ.
1Eŋíná seyí̵ne' Gorɨxomɨ maŋí̵ nɨwiaíkiro í̵wí̵ yagí̵ápimɨ dánɨ naní̵nɨpí̵rí̵a nánɨ imónagí̵áyí̵ne'rɨnɨ. 2Sɨnɨ e nimónɨróná ámá Gorɨxomɨ mɨxí̵darɨgí̵áyí̵ sɨpí yarɨgí̵ápa axí̵pɨ e yagí̵árɨnɨ. Seyí̵ne' kwíyí̵ sɨpíyí̵ aŋí̵ pɨrí̵yo emearɨŋí̵yo xiáwomɨ —O ámá Gorɨxomɨ maŋí̵ wiaíkiarɨgí̵áyo sɨpípɨ e'í̵rɨxɨnɨrɨ dɨŋí̵ ukɨkayoŋorɨnɨ. Oborɨnɨ. Omɨ seyí̵ne' enɨ xí̵dagí̵árɨnɨ. 3Ámá Gorɨxomɨ maŋí̵ wiaíkiarɨgí̵áyí̵ yarɨgí̵ápa nene enɨ axí̵pɨ nerane pí pí nɨpɨkwɨnɨ mimónɨŋí̵pɨ oyaneyɨnɨrɨ mɨŋí̵ nɨneainɨrí̵ná sa ananɨ yagwárɨnɨ. Pí pí í̵eapá neainí̵í̵pɨranɨ, negí̵ dɨŋí̵yo dánɨ oyaneyɨnɨrɨ neaimóní̵í̵pɨranɨ, sa ananɨ yagwárɨnɨ. Ámá Gorɨxo wikí̵ nɨwónɨrɨ pɨrí̵ umamóáná naní̵nɨpí̵rí̵áyí̵ ní̵nɨ yarɨgí̵ápa nene enɨ negí̵ ne'ra wagwápimɨ dánɨ nerí̵ná axí̵pɨ naní̵naní̵wánɨrɨ yagwárɨnɨ. 4Nene e imónanɨrɨ yagwá aiwɨ Gorɨxo nene nánɨ dɨŋí̵ sɨpí nɨwirí̵ná xwapí̵ ayá wí wiarɨŋagɨ nánɨ “Wá onɨmiápɨ wianí̵ɨmɨgɨnɨ.” mɨwimóní̵ ayá wí neawianɨŋí̵rɨnɨ. 5Nene rɨxa naŋí̵ imónɨŋáná wá neawianɨŋí̵manɨ. Nene sɨnɨ oyá maŋí̵ nɨwiaíkirane í̵wí̵ yagwápimɨ dánɨ naní̵naní̵wá nánɨ imónɨŋáná wá nɨneawianɨrɨ Kiraiso ámɨ owiápí̵nɨmeanɨrɨ sɨŋí̵ nɨwimɨxɨrí̵ná nene enɨ nawínɨ sɨŋí̵ neaimɨxɨŋí̵rɨnɨ. Gorɨxo wá nɨseawianɨrɨŋí̵pimɨ dánɨ yeáyí̵ seayimɨxemeaŋí̵rɨnɨ. 6Nene Kiraisɨ Jisaso tí̵nɨ nawínɨ sɨŋí̵nɨŋí̵ nɨneaimɨxɨrɨ neawárɨŋí̵manɨ. O tí̵nɨ nawínɨ ikárɨnɨŋwae'ne eŋagɨ nánɨ o xwárɨpáyo dánɨ owiápí̵nɨmeanɨrɨ nɨwimɨxɨrí̵ná nene o tí̵nɨ nawínɨ wiápí̵nɨmeáí̵rɨxɨnɨrɨ neaimɨxɨrɨ aŋí̵namɨ gí̵ íwo we' náu'mɨnɨ oŋweanɨrɨ nɨwimɨxɨrí̵ná o tí̵nɨ nawínɨ ŋweáí̵rɨxɨnɨrɨ neaimɨxɨrɨ eŋí̵rɨnɨ. 7Ayí̵ rɨpɨ nánɨ e eŋí̵rɨnɨ. Ámá ní̵nɨ agwɨ ríná ŋweagí̵áyí̵ranɨ, ná rí̵wí̵yo ŋweapí̵rí̵áyí̵ranɨ, ní̵nɨ Gorɨxo ámá nánɨ dɨŋí̵ sɨpí nɨwirɨ Kiraisɨ Jisaso urowáre'napɨŋí̵pɨ nánɨ dɨŋí̵ nɨmoróná dɨŋí̵ re yaiwíí̵rɨxɨnɨrɨ nánɨ e eŋí̵rɨnɨ, “O dɨŋí̵ wɨkwí̵rogí̵áyo wá onɨmiápɨ nɨwianɨrɨ urowáre'napɨŋí̵manɨ. Wá ámá wianarɨgí̵ápɨ tí̵nɨ xɨxenɨ me' seáyɨ e imónɨŋí̵pimɨ aí wiárí̵ nɨmu'rorɨ imónɨŋí̵pɨ nɨwianɨrɨ urowáre'napɨŋí̵rɨnɨ.” yaiwíí̵rɨxɨnɨrɨ nánɨ Gorɨxo e eŋí̵rɨnɨ. 8Seyí̵ne' Jisasomɨ dɨŋí̵ wɨkwí̵róáná Gorɨxo wá nɨseawianɨrɨ seaiiŋí̵pimɨ dánɨ yeáyí̵ seayimɨxemeaŋí̵rɨnɨ. Segí̵ dɨŋí̵ tí̵nɨ egí̵ápimɨ dánɨ yeáyí̵ seayimɨxemeaŋí̵manɨ. Seyí̵ne' naŋí̵ yarɨŋagí̵a sɨŋwí̵ nɨseanɨrɨ nánɨ yeáyí̵ seayimɨxemeaŋí̵manɨ. Ámá wí aí wigí̵ egí̵ápɨ nánɨ weyí̵ mɨmearɨnɨpa e'í̵rɨxɨnɨrɨ anɨpá yeáyí̵ seayimɨxemeaŋí̵rɨnɨ. 10Ayí̵ rɨpɨ nánɨrɨnɨ. Agwɨ nene imónɨŋwápɨ Gorɨxo neaimɨxɨŋenerɨnɨ. Kiraisɨ Jisaso tí̵nɨ ikárɨnɨŋwae'ne neaimɨxɨŋí̵ eŋagɨ nánɨ “Imɨrɨŋí̵ mimónɨŋí̵pɨnɨ e'í̵rɨxɨnɨ.” yaiwiŋí̵pɨ —Apɨ eŋíná dánɨ repeárɨŋí̵pɨrɨnɨ. Apimɨ xí̵dí̵í̵rɨxɨnɨrɨ neaimɨxɨŋenerɨnɨ.“Kiraiso Judayene tí̵nɨ e'máyí̵ne' tí̵nɨ nawínɨ neakumɨxárɨŋí̵rɨnɨ.” urɨŋí̵ nánɨrɨnɨ.
11Ayɨnánɨ eŋíná seyí̵ne' segí̵ se'náíwa seaxɨrɨgí̵e dánɨ e'má imónɨgí̵áyí̵ne' —Seyí̵ne' nánɨ Judayí̵ re seararɨgí̵áyí̵ne'rɨnɨ, “Iyí̵ sí̵mí̵ sí̵ó mɨwákwínɨgí̵áyí̵rɨnɨ.” seararɨgí̵áyí̵ne'rɨnɨ. E nɨrɨro aí “Iyí̵ sí̵mí̵ sí̵ó wákwínarɨŋwae'nerɨnɨ.” rɨnarɨgí̵áyí̵ yarɨgí̵ápɨ, ayí̵ Gorɨxoyá we' tí̵nɨ marí̵áɨ, ámá we' tí̵nɨnɨ wákwínarɨgí̵ápɨrɨnɨ. Seyí̵ne' eŋíná imónagí̵ápɨ nánɨ sɨnɨ dɨŋí̵ oseainɨnɨ. 12Íná Kiraiso tí̵nɨ mɨkumɨxɨní̵ xegí̵ bɨ nimónɨro ná jí̵amí̵nɨŋí̵ ŋweaagí̵árɨnɨ. Gwí̵ Isɨrerɨyí̵yá imónɨgí̵árí —Arí Gorɨxo nionɨyárí oimónɨrɨ í̵á yamɨxɨŋí̵rírɨnɨ. Arí tí̵nɨ seyí̵ne' wigí̵yí̵ wí imónagí̵ámanɨ. Xwɨyí̵á gwí̵ arímɨ sí̵mɨmaŋí̵ e dánɨ “E nɨseaiimí̵árɨnɨ.” re'roárɨŋí̵pɨ seyí̵ne' enɨ nɨseakumɨxɨrɨ mɨsearagí̵yí̵ne'rɨnɨ. Seyí̵ne' ámá Gorɨxomɨ mɨxí̵darɨgí̵áyí̵ tí̵nɨ nɨkumɨxɨnɨróná rí̵we'ná naŋí̵ apɨ neaímeaní̵árí̵anɨrɨ dɨŋí̵ nikwí̵moro xwayí̵ nanɨrɨ ŋweaagí̵ámanɨ. Gorɨxo nánɨ bɨ nɨjí̵á imónagí̵ámanɨ. 13Eŋíná seyí̵ne' e nimónɨro Gorɨxo tí̵ámɨnɨ ná jí̵amí̵nɨŋí̵ ŋweaagí̵a aiwɨ agwɨ ríná Kiraisɨ Jisaso tí̵nɨ nawínɨ ikárɨnɨgí̵á eŋagɨ nánɨ o nɨseapeirí̵ná xegí̵ ragí̵ pu'í̵pimɨ dánɨ nipemeámɨ Gorɨxo tí̵ŋí̵mɨnɨ aŋwɨ e'nɨŋí̵ seabɨŋí̵rɨnɨ. 14E'máyí̵ne' Judayí̵ tí̵nɨ sɨnɨ sí̵mí̵ tí̵nɨ minɨpa epí̵rí̵a nánɨ pɨyí̵á neawí̵rɨŋí̵rɨnɨ. E nerí̵ná e'máyí̵ne' Judayí̵ tí̵nɨ sí̵mí̵ tí̵nɨ inagí̵ápɨ, apɨ xwí̵nánɨŋí̵ nɨseamudí̵morɨ pí̵roŋí̵pɨ xí̵o pe'í̵pimɨ dánɨ xwí̵ná nɨpɨneamorí̵nɨŋí̵ nerɨ ámá apiau' sɨyikí̵ ná bɨnɨ imónɨpɨsi nánɨ imɨxɨŋí̵rɨnɨ. 15Xwí̵nánɨŋí̵ nɨseamudí̵morɨ pí̵roŋí̵pɨ —Apɨ ŋwí̵ ikaxí̵ eánɨŋí̵yo “E e'í̵rɨxɨnɨ. E e'í̵rɨxɨnɨ.” nɨrɨrɨ sekaxí̵ nɨra uŋí̵pɨ tí̵nɨ “E mepanɨ. E mepanɨ.” nɨrɨrɨ ŋwí̵ ikaxí̵ nɨra uŋí̵pɨ tí̵nɨ ayo eánɨŋí̵pɨrɨnɨ. Apɨ rɨxa sɨwiá imɨxɨŋí̵rɨnɨ. Ayí̵ e'máyí̵ne' tí̵nɨ Judayí̵ tí̵nɨ ámá apiau' nionɨ tí̵nɨ nikárɨnɨrɨŋí̵pimɨ dánɨ sɨyikí̵ ámɨ sɨŋí̵ ná bɨnɨ oimónɨrɨ ŋwí̵ ikaxí̵ eánɨŋí̵pɨ sɨwiá imɨxɨŋí̵rɨnɨ. E nerí̵ná ámá apiau'mɨ pɨyí̵á wí̵rɨŋí̵rɨnɨ. 16Yoxáí̵pámɨ peŋí̵pimɨ dánɨ ámá apiau' sí̵mí̵ tí̵nɨ inagí̵ápɨ xwapí̵rá eaárɨrɨ sɨyikí̵ ná bɨnɨ oimónɨrɨ nɨkumɨxɨmáná Gorɨxo tí̵ámɨnɨ nipemeámɨ urɨ emí̵ánɨrɨ ŋwí̵ ikaxí̵ eánɨŋí̵pɨ ná mayí̵ sɨwiá imɨxɨŋí̵rɨnɨ. 17O nɨbɨrɨ e'máyí̵ne', Gorɨxo tí̵ŋí̵ ná jí̵amí̵nɨŋí̵ ŋweagí̵áyí̵ne' tí̵nɨ Judayí̵, o tí̵ŋí̵ aŋwɨ e'nɨŋí̵ ŋweagí̵áyo tí̵nɨ wáí̵ re searɨŋí̵rɨnɨ, “Nɨyí̵ne'nɨ tí̵nɨ nawínɨ imónɨpí̵rɨ nánɨ rɨxa pɨyí̵á seawí̵rɨŋárɨnɨ.” searɨŋí̵rɨnɨ. 18O, negí̵ wo imónɨŋo ápo Gorɨxo tí̵ámɨnɨ ŋweaŋagɨ nánɨ Judayene tí̵nɨ e'máyí̵ne' tí̵nɨ ananɨ xegí̵ kwíyí̵ neaiapɨŋí̵pimɨ dánɨ ananɨ o tí̵ŋí̵mɨnɨ upaxí̵ imónɨŋwɨnɨ. 19Ayɨnánɨ seyí̵ne' sɨnɨ wí eŋí̵yí̵ne' mimónɨŋoɨ. Sɨnɨ xeŋwí̵yí̵ne' mimónɨŋoɨ. Oweoɨ, rɨxa ámá Gorɨxoyá imónɨgí̵áyí̵ tí̵nɨ kumɨxɨnɨŋoɨ. Rɨxa Gorɨxoyá í̵wiaxe' wiyí̵ne'nɨŋí̵ imónɨŋoɨ. 20Ayí̵ rɨpɨ seararɨŋɨnɨ. Gorɨxo aŋí̵ wiwá nɨmɨrɨrí̵ná wáí̵ wurɨmeiarɨgí̵áwa tí̵nɨ wí̵á rókiamoarɨgí̵áwa tí̵nɨ nɨtɨwayɨrómáná e'máyí̵ne' enɨ seáyɨ e nɨseaikwiárɨmáná nɨmɨra peyarɨŋí̵pí̵nɨŋí̵ imónɨnɨ. Aŋí̵ iwá nánɨ sí̵ŋá xámɨ nɨtɨwayɨrorɨ tɨnɨŋo, ayí̵ Kiraisɨ Jisasorɨnɨ. 21Aŋí̵ niwánɨ o eŋí̵pimɨ dánɨ píránɨŋí̵ nɨkɨkírónɨga urɨ xwe' nimóga urɨ yarɨŋagɨ nánɨ aŋí̵ ŋwí̵á Ámɨnáo nánɨ wiwá imónarɨnɨ. 22E'máyí̵ne' enɨ Kiraiso tí̵nɨ ikárɨnɨgí̵áyí̵ne' eŋagɨ nánɨ o aŋí̵ Gorɨxo xegí̵ kwíyí̵pimɨ dánɨ ŋweaní̵a nánɨ iwá nɨmɨra nɨpeyirí̵ná xí̵oyá sɨyikí̵ imónɨgí̵á wínɨyí̵ tí̵nɨ nɨseakumɨxɨrɨ nɨmɨra peyarɨnɨ.
Copyright information for
AAK